Shugaba Muhammadu Buhari ya shirya tsab domin gabatar da kudurin kasafin kudin shekara mai zuwa ta 2018.
Hakan na kunshe ne a wata sanarwa da fadar shugaban kasa ta fitar ta hannun Mataimaki na musamman a ofishin shugaban kasa akan kafafen yada labarai na zamani, Malam Bashir Ahmad.
Sanarwar ta nuna cewa, a ranar Talata 7 ga watan Nuwamba na wannan shekara ne ake sa ran Shugaba Muhammadu Buhari ya gabatar da kudurin kasafin kudin shekarar 2018 a gaban majalisun tarayya.
Sai dai sanarwar bata yi karin haske ba akan abubuwan da kasafin kudin ya kunsa ba.
Rahotanni sun nuna cewa, tuni dai Shugaban ya aike da takarda a Majalisun tarayya domin neman su amince masa ya bayyana a gaban su domin yin bayanai game kasafin kudin.
